എപ്പോഴും തണുപ്പാണോ? കാരണങ്ങൾ ഇതാവാം

മഴയാണെങ്കിലും, വെയിലാണെങ്കിലും ഏത് കാലാവസ്ഥയിലും തണുപ്പ് അനുഭവപ്പെടാറുണ്ടോ.. കൂടെയുള്ള ആർക്കും കാലാവസ്ഥയില്‍ മാറ്റമൊന്നും തോന്നാത്തപ്പോഴും നിങ്ങള്‍ക്ക് തണുപ്പ് അനുഭവപ്പെടുന്നുണ്ടെങ്കില്‍ അതിന് പിന്നില്‍ ചില കാരണങ്ങളുണ്ട്. അകാരണമായി തണുപ്പ് അനുഭവപ്പെടുന്നത് ശരീരം കാണിച്ച് തരുന്ന ചില അടയാളങ്ങളാണെന്ന് പഠനങ്ങള്‍ പറയുന്നു. തണുപ്പിന്റെ കാരണങ്ങള്‍ എന്തൊക്കെ എന്ന് നോക്കാം.

രക്തയോട്ടം കുറയുന്നത്

കൃത്യമായി രക്തയോട്ടം നടക്കുന്ന ശരീരത്തില്‍ ചെറിയ ചൂടുണ്ടാവും. എന്നാല്‍ രക്തയോട്ടം കുറവാണെങ്കില്‍ ശരീരത്തിന് ആ ചൂട് നിലനിര്‍ത്താന്‍ കഴിയില്ല, ഇത് നിങ്ങള്‍ക്ക് സദാ തണുപ്പ് അനുഭവപ്പെടാന്‍ കാരണമാകുന്നു. ഹൃദയ സംബന്ധമായ അസുഖമുള്ളവരിലാണ് പലപ്പോഴും ഇത്തരത്തില്‍ തണുപ്പ് അനുഭവപ്പെടുന്നതായി കണ്ടിട്ടുള്ളത്. ഹൃദയത്തിന് അസുഖമുണ്ടാകുമ്പോള്‍ കൃത്യമായി രക്തചംക്രമണം നടക്കാത്തതാണ് ഇതിന് കാരണം. കൂടാതെ ഒരേ സ്ഥാനത്ത് തന്നെ വ്യതിചലിക്കാതെ നിശ്ചിത സമയത്തില്‍ കൂടുതല്‍ ഇരിക്കുമ്പോഴോ നില്‍ക്കുമ്പോഴോ, കിടക്കുമ്പോഴോ രക്തയോട്ടം കുറയുന്നു.

അനീമിയ

രക്തത്തിലെ ഇരുമ്പിന്റെ കുറവിനെ അനീമിയ എന്ന് പറയുന്നു. രക്തത്തിലെ ഓക്‌സിജന്റെ പ്രവര്‍ത്തനങ്ങള്‍ കൃത്യമായി നടക്കുന്നതിന് ഇരുമ്പിന്റെ സാന്നിധ്യം അത്യാവശ്യമാണ്. 1996 പുറത്തിറങ്ങിയ ഒരു പഠനപ്രകാരം ശരീരത്തില്‍ ഇരുമ്പിന്റെ അംശം കുറയുന്നത് ശരീരോഷ്മാവിനെ അസന്തുലിതമാക്കുമെന്ന് തെളിയിച്ചിട്ടുണ്ട്. നിങ്ങള്‍ക്ക് ഇരുമ്പിന്റെ കുറവുണ്ടെങ്കില്‍ ശരീരത്തിന് ആവശ്യമായ ചൂട് നല്‍കാന്‍ കഴിയില്ല, അതുകൊണ്ട് തന്നെ എപ്പോഴും തണുപ്പ് അനുഭവപ്പെടുന്നു.

തൈറോയിഡ്

തൈറോയിഡുമായി ബന്ധപ്പെട്ട് അസുഖങ്ങളുള്ള ആളാണ് നിങ്ങളെങ്കില്‍, ശരീരത്തിന് തണുപ്പ് അനുഭവപ്പെടാന്‍ സാധ്യതയുള്ളതായി പഠനങ്ങള്‍ വ്യക്തമാക്കുന്നു. തൈറോയിഡ് ഗ്രന്ഥി കഴുത്തിന്റെ ഭാഗത്തായി സ്ഥിതി ചെയ്യുന്ന ഒരു ചെറിയ ഭാഗമാണ്. ഇത് ശരീരത്തില്‍ മെറ്റബോളിസത്തെയും, ശരീരോഷ്മാവിനെയും നിയന്ത്രിക്കുന്നതില്‍ വലിയ പങ്കുവഹിക്കുന്നു. തൈറോയിഡിന്റെ അസന്തുലിതാവസ്ഥ മനസിലാക്കാന്‍ ചെറിയ രക്തപരിശോധനയിലൂടെ സാധിക്കുന്നു.

ഉറക്കക്കുറവ്

നന്നായി ഉറങ്ങുന്നത് ശരീരത്തിന് ഉന്മേഷവും, ആരോഗ്യവും നല്‍കാന്‍ സഹായിക്കുന്നു. ഉറക്കക്കുറവോ, മതിയായ വിശ്രമമില്ലായ്മയോ മെറ്റബോളിസത്തെ ബാധിക്കുന്നു. ഇത് നിങ്ങളുടെ ശരീരത്തെ ചൂടാകാന്‍ അനുവദിക്കാതിരിക്കുകയും, തണുപ്പ് അനുഭവപ്പെടുകയും ചെയ്യുന്നു. ഉറക്കകുറവ് ഒരു പരിധി കഴിഞ്ഞാല്‍ ശരീരത്തിന്റെ എല്ലാ പ്രവര്‍ത്തനങ്ങളെയും മന്ദഗതിയിലാക്കുമെന്നാണ് പഠനങ്ങള്‍ പറയുന്നത്.

Content Highlight; Why Some People Always Feel Cold: Common Causes Explained